اسلام آباد(ویب ڈیسک)وزیراعظم عمران خان نے مشرق وسطیٰ کی کشیدہ صورتحال پر تشویش کا اظہار کرتے ہوئے کہا ہے کہ پاکستان نے نیک نیتی سے سعودی عرب ایران تنازع اور ایران امریکہ کشیدگی میں کمی کی کوششیں کیں۔ ان کا کہنا تھا کہ پاکستان امن کا پارٹنر بنے گا اور پاکستان خطے میں مزید کسی جنگ کا حصہ نہیں بنے گا۔
وزیراعظم عمران خان سے عمان کے وزیر مذہبی امور عبداللہ بن محمد بن عبداللہ السلمی نے اسلام آباد میں ملاقات کی۔
اعلامیے کے مطابق وزیراعظم عمران خان اور عمانی وزیر کی ملاقات میں دونوں ممالک کے باہمی دلچپسی کے امور اور مشرق وسطیٰ کی صورتحال پر بھی گفتگو ہوئی۔
وزیراعظم عمران خان نے مشرق وسطیٰ کی کشیدہ صورتحال پر تشویش کا اظہار کرتے ہوئے کہا کہ مزید کشیدگی سے بچنے کے لیے اقدامات کرنا ہوں گے کیوں کہ جنگ کسی کے بھی مفاد میں نہیں۔
انہوں نے کہا کہ خطے میں تنازع سے پاکستان کو بہت نقصان ہوا ہے، پاکستان خطے میں مزید کسی جنگ کا حصہ نہیں بنے گا۔
وزیراعظم کا کہنا تھا کہ ایران امریکا کشیدگی کم کرنے کی کوشش کی، ایران اور سعودی عرب کے تنازعات ختم کرنے کے لیے بھی کوششیں کیں، پاکستان ہمیشہ امن کا پارٹنر بنے گا، پاکستان خطے میں قیامِ امن اور تنازعات کے خاتمے کے لیے کردار ادا کرے گا۔
وزیراعظم نے عمانی سلطان کے لیے نیک خواہشات کا اظہار کیا اور کہا کہ پاکستان اور عمان مختلف شعبوں میں تعاون بڑھا سکتے ہیں۔
عمران خان نے مقبوضہ کشمیر میں بدترین انسانی صورتحال سے بھی عمانی وزیر کو آگاہ کیا اور کہا کہ مقبوضہ کشمیر میں 5 ماہ سے بدترین لاک ڈاؤن جاری ہے۔
وزیراعظم عمران خان نے بھارت میں مسلمانوں سمیت اقلیتوں سے امتیازی سلوک کی بی جے پی پالیسیوں سے بھی آگاہ کیا اور مطالبہ کیا کہ عالمی برادری اس صورتحال سے نمٹنے کے لیے اقدامات کرے۔