امریکہ میں پراسرار چیز کی پروازیں،پنٹاگون نے ویڈیو جاری کر دی

امریکا میں فوجی اڈوں کے اوپر ڈرون نما چیزوں کی پراسرار پروازوں نے سب کو حیرت میں ڈال دیا۔

عوامی بے یقینی کے خاتمے کیلئے پینٹاگون کو ویڈیو جاری کرنی پڑی، یہ دراصل تین ویڈیوز ہیں جنہیں ایک ہی کر کے کلپ کی صورت میں جاری کیا گیا۔

ویڈیو میں دیکھا جاسکتا ہے کہ پراسرار ڈیوائسز (اڑن طشتری یا یو ایف او) امریکی فوجی اڈوں کے عین اوپر پرواز کررہے ہیں۔ فوٹیج میں پائلٹ حیرانی کا اظہار کررہے ہیں کیونکہ اڑن طشتری یا پراسرار شے کی پرواز بہت زیادہ تیز ہے۔

پینٹاگون کے ترجمان نے امریکی میڈیا سے گفتگو کرتے ہوئے بتایا کہ ‘عوام میں فوٹیج کی موجودگی یا عدم موجودگی کے حوالے سے غلط فہمیوں کو دور کرنے کے لیے یہ قدم اٹھایا گیا، محکمے نے انہیں جاری کرنے سے قبل اس بات کا اطمینان کرلیا کہ یہ کسی قسم کے حساس نظام کے بارے میں آگاہی نہیں دے رہیں۔

انہوں نے کہا کہ ویڈیو میں نظر آنے والی پراسرار ڈیوائس کی پرواز ہمارے لیے کسی خطرے یا پریشانی کا باعث نہیں ہیں، البتہ ابھی تک اس نتیجے پر بھی نہیں پہنچ سکے کہ پرواز کرنے والی چیزیں درحقیقت کیا ہیں۔ انہوں نے کہا کہ ممکنہ طور پر یہ ڈرون بھی ہوسکتے ہیں یا پھر یو ایف او البتہ اس بارے میں کچھ بھی کہنا قبل از وقت ہوگا۔